Ahmedabad

અમદાવાદમાં ગાજવીજ સાથે વરસાદ તૂટી પડતા ગરબા આયોજકો ચિંતામાં…હજુ પણ ભારે વરસાદની આગાહી

અમદાવાદમાં ગુરુવારની રાત્રે એકાએક ભારે પવન અને ગાજવીજ સાથે ધોધમાર વરસાદ તૂટી પડ્યો હતો. વરસાદ અને પવનની તીવ્રતા એવી હતી કે, અમદાવાદીઓ પણ ચોંકી ઉઠ્યા હતા. આ સમયે રસ્તામાં વાહન ચલાવતાં વાહનચાલકોને ખૂબ જ મુશ્કેલીનો સામનો કરવો પડ્યો હતો. કેમ કે, રસ્તામાં આગળ 10 ફૂટનો રસ્તો જોવામાં પણ તેમને તકલીફ પડતી હતી.

પાછલા બે દિવસથી શહેરમાં પડી રહેલા ધોધમાર વરસાદના પગલે ગરબા આયોજકો ચિંતામાં મુકાઈ ગયા છે. ગુરુવારે સતત બીજા દિવસે પણ અમદાવાદમાં વરસાદ વરસતા ગરબા માટે રવિવાર સુધીમાં ગ્રાઉન્ડ તૈયાર કેવી રીતે થશે તે પ્રશ્ન ગરબા આયોજકોને મુંજાવી રહ્યો છે. એવામાં હવે તેમની પાસે ભગવાનને પ્રાર્થના કરવા રાખવા સિવાય કોઈ વિકલ્પ બાકી રહ્યો નથી.

કર્ણાવતી ક્લબના પ્રેસિડેન્ટ જયેશ મોદી કહે છે, ‘અમે ઓર્કેસ્ટ્રા અને અન્ય સાધનો વરસાદમાં પલળે નહીં તેનું સંપૂર્ણ ધ્યાન રાખી રહ્યા છીએ. પરંતુ મેદાન ભીનું થવા મામલે અમે કશું કરી શકતા નથી. અમે માત્ર ભગવાનને પ્રાર્થના કરી શકીએ કે વરસાદ બંધ થાય જેથી મેદાન સુકાય અને લોકો ગરબા રમવા આવી શકે.’

આ ઉપરાંત ઈવેન્ટ મેનેજમેન્ટ્સ કંપનીનોને પણ સ્પોન્સરશીપ ન મળતી હોવાના કારણે મોટું નુકસાન સહન કરવું પડી શકે છે. ઈવેન્ટ-મેનેજમેન્ટ કંપનીના માલિક દેવાંગ ભટ્ટ કહે છે, ‘આ વખતે નવરાત્રિમાં સ્પોન્સરશીપ ખૂબ મુશ્કેલીથી મળી રહી છે.’ ઉલ્લેખનીય છે કે દર વખતે અમદાવાદીઓ ભારે ઉત્સાહ સાથે નવરાત્રીમાં ગરબા રમવા જતા હોય છે. એવામાં આ વર્ષે હજુ સુધી ચોમાસાએ વિદાય લીધી નથી. હવામાન વિભાગની આગાહી મુજબ રાજ્યમાં 5 દિવસ સુધી વરસાદની સંભાવના છે.

Back to top button