વર્લ્ડકપ: પાકિસ્તાન સામે ભારતનો શાનદાર વિજય, બાબરની ટીમ અમદાવાદમાં સરેન્ડર

IND vs PAK, ODI World Cup 2023: ODI વર્લ્ડ કપ 2023 ની મેચ ભારત અને પાકિસ્તાન વચ્ચે રમાઈ હતી. ટીમ ઈન્ડિયાએ આ મેચ 7 વિકેટે જીતી લીધી. આ જીત સાથે ટીમ ઈન્ડિયા પોઈન્ટ ટેબલમાં પણ પ્રથમ સ્થાને પહોંચી ગઈ છે. ભારતની જીતમાં બોલરો અને રોહિત શર્માએ મહત્વની ભૂમિકા ભજવી હતી. ભારતે સતત 8મી વખત વર્લ્ડ કપમાં પાકિસ્તાનને હરાવ્યું છે. આ સાથે જ ભારત સામે વર્લ્ડકપમાં પહેલી જીતનું પાકિસ્તાનનું સપનું ફરી એકવાર ચકનાચૂર થઈ ગયું. હવે ભારત 8-0થી આગળ છે.

ભારત અને પાકિસ્તાન વચ્ચે રમાયેલી મેચની વાત કરીએ તો આ મેચમાં ટીમ ઈન્ડિયાના કેપ્ટન રોહિત શર્માએ ટોસ જીતીને બોલિંગ કરવાનો નિર્ણય કર્યો હતો. પ્રથમ બેટિંગ કરતા પાકિસ્તાનની ટીમ 42.5 ઓવરમાં 191 રનમાં ઓલઆઉટ થઈ ગઈ હતી. આ દરમિયાન શાર્દુલ ઠાકુર સિવાય ભારતના તમામ બોલરોએ આ મેચમાં વિકેટ લીધી હતી. જો કે શાર્દુલે માત્ર બે ઓવર નાંખી હતી.

અન્ય બોલરોની વાત કરીએ તો દરેકે બે-બે વિકેટ ઝડપી હતી. જેમાં મોહમ્મદ સિરાજ, જસપ્રિત બુમરાહ, હાર્દિક પંડ્યા, રવિન્દ્ર જાડેજા અને કુલદીપ યાદવના નામ સામેલ છે. પાકિસ્તાન તરફથી બાબર આઝમે સૌથી વધુ 50 રનની ઇનિંગ રમી હતી. જ્યારે મોહમ્મદ રિઝવાને 49 રન બનાવ્યા હતા.