ઉન્નાવમાં ગેંગરેપનો ભોગ બનેલી યુવતીનું દિલ્હીની સફદરજંગ હોસ્પિટલમાં મોડી રાત્રે મોત નીપજ્યું હતું. પીડિતાને લખનૌથી દિલ્હી લઈ જવામાં આવી હતી. પીડિતાનું શરીર 95 ટકા બળી ગયું હતું. સફદરજંગ હોસ્પિટલના ડોકટરે ઉન્નાવ રેપ પીડિતાના મોતની પુષ્ટિ કરી છે.સફદરજંગ હોસ્પિટલના બર્ન એન્ડ પ્લાસ્ટિક સર્જરી વિભાગના વડા ડો.શાલભ કુમારે જણાવ્યું હતું કે અમારા ઘણા પ્રયાસો છતાં પીડિતાને બચાવી શકાઈ નહીં. સાંજે તેની તબિયત લથડવાનું શરૂ થયું. રાત્રે 11.10 વાગ્યે તેને હૃદયનો હુમલો આવ્યો હતો. અમે તેની સારવાર શરૂ કરી અને તેને બચાવવા માટે અમારો શ્રેષ્ઠ પ્રયાસ કર્યો, પરંતુ તે રાત્રે 11.40 વાગ્યે મૃત્યુ પામી.
ડો.શાલભે જણાવ્યું હતું કે, હાલમાં પીડિતાનો મૃતદેહ મોર્ચરી મોકલવામાં આવ્યો છે. આ અંગે હોસ્પિટલમાં હાજર પીડિતાની માતા, બહેન અને ભાઈને જાણ કરવામાં આવી છે. તમને જણાવી દઈએ કે પીડિતાના મૃત્યુ પહેલા, તેણે તેના ભાઈને કહ્યું કે મારે જીવવું છે. પીડિતાએ એમ પણ કહ્યું હતું કે ગુનેગારોને સૌથી કડક સજા થવી જોઈએ.
ફોટો:PTI
અગાઉ પીડિતાનો મેડિકલ રિપોર્ટ બહાર પાડવામાં આવ્યો હતો. રિપોર્ટ અનુસાર, બળાત્કાર પીડિતાના શરીર પર કોઈ બાહ્ય કે આંતરિક ઇજાઓ મળી નથી, ફક્ત સળગાવવાના પુરાવા મળ્યાં છે. તે જ સમયે, યુપી આઈજી પ્રવીણ કુમારે એમ પણ કહ્યું કે પીડિતાને સળગાવી દેતા પહેલા અથવા પછી છરી કે હિંસા અંગે કોઈ નિશાન નથી.
ગુરુવારે ઉન્નાવમાં પેટ્રોલ નાખીને ગેંગરેપ પીડિતાને જીવતી સળગાવી દેવામાં આવી હતી. ગામલોકોના જણાવ્યા મુજબ, 95 ટકા બળી ગયા પછી પણ પીડિતા સ્થળથી એક કિલોમીટર ચાલીને મદદ માટે આવી હતી. પીડિતાએ પોતે 112 ને ફોન કર્યો હતો અને પોલીસને ઘટના વિશે જણાવ્યું હતું.તે જ સમયે, ગેંગરેપ પીડિતાને સળગાવી દેવાના કેસમાં પોલીસે પાંચેય આરોપીની ધરપકડ કરી છે. આ કેસની નોંધ લેતા ઉત્તર પ્રદેશના મુખ્ય પ્રધાન યોગી આદિત્યનાથે પીડિતાની સારવાર કરવામાં મદદ કરવા અને આરોપી સામે કડક કાર્યવાહી કરવા આદેશ આપ્યો હતો.
