દિલ્હીને અડીને આવેલા ગુરુગ્રામની પોલીસે બુધવારે અહીં રસ્તા પર નગ્ન થઈને ભાગવા બદલ એક વિદેશી નાગરિકની અટકાયત કરી હતી. એક અધિકારીએ આ માહિતી આપી છે. પોલીસના જણાવ્યા અનુસાર, આ વ્યક્તિ નાઈજિરિયન નાગરિક હોવાની શંકા છે અને તેને મેડિકલ તપાસ માટે સેક્ટર 10 સિવિલ હોસ્પિટલમાં લઈ જવામાં આવ્યો છે.
બાદશાહપુર પોલીસ સ્ટેશનના ઈન્ચાર્જ ઈન્સ્પેક્ટર મદન લાલે કહ્યું, “જો તેની માનસિક સ્થિતિ સ્થિર હશે તો તેની સામે કેસ નોંધવામાં આવશે.” બુધવારે સાંજે લગભગ 6 વાગ્યાની આસપાસ, તે સેક્ટર 69માં ટ્યૂલિપ ચોક પાસે રસ્તાની વચ્ચે નગ્ન હાલતમાં દોડતો જોવા મળ્યો હતો, જેના કારણે ટ્રાફિક જામ થયો હતો. જ્યારે પોલીસ સ્થળ પર પહોંચી, ત્યારે તે એક ગામ તરફ ભાગ્યો, જ્યાં સ્થાનિક લોકોએ તેને પકડી લીધો અને તેને એક ઝાડ સાથે બાંધી દીધો.
ગયા વર્ષે નવેમ્બરમાં મુંબઈથી પણ આવો જ એક કિસ્સો પ્રકાશમાં આવ્યો હતો. મહારાષ્ટ્રના થાણેમાં ત્યારે હંગામો મચી ગયો જ્યારે લોકોએ રસ્તા પર એક વ્યક્તિને તંત્ર-મંત્રનો જાપ કરતા જોયો. તે નગ્ન બેઠો હતો. તે અગ્નિ પ્રગટાવીને અને તેમાં કેટલીક સામગ્રી મૂકીને મેલીવિદ્યા કરતો હતો. તેનું કૃત્ય જોવા લોકો એકઠા થઈ ગયા. જેના કારણે લગભગ અડધો કલાક ટ્રાફિક જામ થયો હતો.
ઘટના કલ્યાણ પશ્ચિમના આગ્રા રોડ વિસ્તારની છે. અહીં રાત્રે લગભગ 11.30 વાગે એક વ્યક્તિ રોડની વચ્ચે એક હોટલ પાસે નગ્ન હાલતમાં બેઠો હતો. આગ લગાડ્યા પછી તે લાકડાના ટુકડાઓમાં કંઈક નાખતો હતો. તેની સામે સાત સ્ટીલના બાઉલ રાખવામાં આવ્યા હતા. જેમાં કેટલીક સામગ્રી હતી.આ અજીબોગરીબ ઘટના જોવા માટે સ્થાનિક લોકો અને કેટલાક રાહદારીઓ પોતાના વાહનો રોકીને રસ્તાની વચ્ચે ઉભા રહી ગયા હતા. થોડી જ વારમાં લોકોનું ટોળું એકઠું થઈ ગયું. દરમિયાન મોહને વિસ્તારના એક વ્યક્તિએ આ જોયું અને સ્થાનિક પોલીસને જાણ કરી. પોલીસે સ્થળ પર પહોંચીને તેને કસ્ટડીમાં લીધો હતો.
