દરેક માતા-પિતા માટે ચોંકાવનારા સમાચાર: સુરતમાં રમતા રમતા 2 વર્ષીય બાળક પહેલા માળની બાલ્કનીમાંથી નીચે પટકાતા મોત

Surat : સુરતમાં ફરી એકવાર આવી દર્દનાક ઘટના સામે આવી છે જે દરેક વાલીઓને સજાગ કરી દે તેવી છે. રમતી વખતે 2 વર્ષનો બાળક બાલ્કનીના પહેલા માળેથી નીચે પટકાયો હતો. તેનું સારવાર દરમિયાન મોત નિપજ્યું હતું. ઘટના પલસાણા એક્સટેન્શનની મહાદેવ સોસાયટીની છે.

મૂળ મધ્યપ્રદેશના જબલપુરમાં રહેતા શંકર લોધીનો પુત્ર મયંક લોધી ઘરની બાલ્કનીમાં રમી રહ્યો હતો. માતા અંદર રસોઈ કરી રહી હતી. ત્યારે અચાનક બાળક બાલ્કનીમાંથી નીચે પડી ગયો હતો. તેને માથામાં ગંભીર ઈજા થઈ હતી. જે બાદ આસપાસના લોકો ત્યાં દોડી આવ્યા હતા અને 108ની મદદથી બાળકને સારવાર માટે Civil Hospital લઈ ગયા હતા. જ્યાં સારવાર દરમિયાન બાળકનું મોત નીપજ્યું હતું. બાળકના પિતા શંકર લોધી લૂમ્સના ખાતામાં કામ કરીને પોતાનું ગુજરાન ચલાવે છે.

જણાવી દઈએ કે લગભગ 2 મહિના પહેલા પણ સુરતમાં આવી ઘટના સામે આવી હતી. સરથાણાની યોગેશ્વર નગર સોસાયટીમાં દાદી સાથે બેઠેલા પૌત્રનું બીજા માળેથી પડી જવાથી મોત થયું હતું. દાદીમા અચાનક કોઈ કામ માટે અંદર ગયા અને આ દરમિયાન બાળક રમતા રમતા બાલ્કનીમાંથી નીચે પડી ગયો હતો.