બાળકોને સૌથી વધુ શું ગમે છે! હા, તમે સાચુ અનુમાન લગાવ્યું છે, રમકડાં (Toys). દેશના બિઝનેસ ટાયકૂન મુકેશ અંબાણી (Mukesh Ambani)એ બ્રિટિશ ટોય બ્રાન્ડ Hamleys ને ખરીદ્યા બાદ હવે એક પગલું આગળ વધાર્યું છે. હવે રિલાયન્સ ઈન્ડસ્ટ્રી પોતે રમકડાં પણ બનાવશે. રિલાયન્સ રિટેલ અને ઘરઆંગણે ઉગાડવામાં આવેલી રમકડાની કંપની રોવાને રમકડાં બનાવવા માટે હરિયાણા સ્થિત ફર્મ સાથે સંયુક્ત સાહસ સ્થાપ્યું છે.
કંપનીએ રમકડાંના વ્યવસાયને વિસ્તારવા માટે સર્કલ ઇ-રિટેલ, સોનીપત હરિયાણા સાથે સંયુક્ત સાહસમાં પ્રવેશ કર્યો છે. રિલાયન્સ રિટેલના ચીફ ફાઇનાન્શિયલ ઓફિસર (CFO) દિનેશ તલુજાએ ગયા અઠવાડિયે જણાવ્યું હતું કે, અમે રમકડાં બનાવવા માટે સર્કલ ઇ-રિટેલ સાથે સંયુક્ત સાહસ રચ્યું છે.
સૂત્રોના જણાવ્યા અનુસાર કંપની હવે ડિઝાઇનથી લઈને રમકડાં (Toys)ની ડિલિવરી સુધીની પ્રક્રિયાને એકીકૃત કરવાની વ્યૂહરચના પર કામ કરી રહી છે. આ અંતર્ગત રિલાયન્સ રિટેલ ડિઝાઈન અને મેન્યુફેક્ચરિંગથી લઈને પ્રોડક્ટના છૂટક વેચાણ સુધીની સમગ્ર પ્રક્રિયાને નિયંત્રિત કરશે. આનાથી રિલાયન્સ (reliance) ને વિવિધ તબક્કે અન્ય કંપનીઓ પર નિર્ભરતા ઘટાડવામાં મદદ મળશે. સર્કલ-ઇ રિટેલ પાસે રમકડાના ઉત્પાદનમાં નિપુણતા છે. તેની પાસે હરિયાણામાં આધુનિક ઉત્પાદન એકમ છે અને તે રમકડાંની વિશાળ શ્રેણીના ઉત્પાદન અને વિતરણ માટે લાઇસન્સ ધરાવે છે.
