Orewa MD Jaysukh Patel: મોરબી બ્રિજ અકસ્માત મામલે ઓરેવાના MD જયસુખ પટેલ જેલ હવાલે : પુલ ધરાશાયી થતાં 135 લોકોએ જીવ ગુમાવ્યા હતા
Orewa MD Jaysukh Patel jailed in Morbi Bridge accident case
મોરબી બ્રિજ અકસ્માતના આરોપી ઓરેવા ગ્રુપના એમડી જયસુખ પટેલે મંગળવારે મોરબી કોર્ટમાં સરેન્ડર કર્યું હતું. કોર્ટે તેને જેલમાં મોકલી આપ્યો હતો. આ જ મહિનામાં ગુજરાત પોલીસે આ કેસમાં 1262 પાનાની ચાર્જશીટ દાખલ કરી હતી. જેમાં જયસુખ પટેલને પુલ તૂટી પડવાના કેસમાં મુખ્ય આરોપી બનાવવામાં આવ્યા હતા. 24 જાન્યુઆરીના રોજ ગુજરાતની કોર્ટે પટેલ વિરુદ્ધ ધરપકડ વોરંટ જારી કર્યું હતું.
મોરબી બ્રિજ તૂટી પડવાના મામલે ગુજરાત પોલીસે નવ લોકોની ધરપકડ કરી છે. જેમાં ઓરેવા ગ્રુપના ચાર કર્મચારીઓનો સમાવેશ થાય છે. FIRમાં આરોપી તરીકે જયસુખ પટેલનું નામ પણ નોંધાયેલું છે. જયસુખે 20 જાન્યુઆરીએ મોરબીની સેશન્સ કોર્ટમાં આગોતરા જામીન મેળવવા અરજી કરી હતી, પરંતુ કોર્ટે તેને ફગાવી દીધી હતી.
ગુજરાત હાઈકોર્ટ આ મામલે સુનાવણી કરી છે. હાઈકોર્ટે ગયા મહિને મોરબી સસ્પેન્શન બ્રિજની જાળવણી અને સંચાલન કરતી કંપની અજંતા મેન્યુફેક્ચરિંગ લિમિટેડ (ઓરેવા ગ્રૂપ)ને નોટિસ પાઠવી હતી. અરજદારે માંગ કરી છે કે કંપની અકસ્માતને કારણે થયેલા નુકસાનની ચૂકવણી માટે જવાબદાર બને. અજંતા કંપનીએ પુલના સમારકામ માટે દેવપ્રકાશ સોલ્યુશન્સ સાથે કરાર કર્યો હતો.
આ પુલને દિવાળીની રજાઓમાં સરકારને જાણ કર્યા વિના કે ફિટનેસ સર્ટિફિકેટ મેળવ્યા વિના લોકો માટે ખુલ્લો મૂકી દેવાયો હતો. અગાઉ મોરબીના ચીફ જ્યુડિશિયલ મેજિસ્ટ્રેટ એમ.જે.ખાને પટેલ વિરુદ્ધ ધરપકડ વોરંટ જારી કર્યું હતું. પોલીસ એફઆઈઆરમાં પટેલનું નામ ન હતું. તપાસ બાદ 10મા આરોપી તરીકે પટેલનું નામ ઉમેરાયું હતું.
Surrender of Jaysukh Patel: ભાગેડુ જયસુખ પટેલે કર્યુ સરેન્ડર
મોરબી શહેરની મચ્છુ નદી પરનો ઝૂલતો પુલ ગત વર્ષે 30 ઓક્ટોબરે ધરાશાયી થયો હતો. આ અકસ્માતમાં 135 લોકોના મોત થયા હતા. મૃતકોમાં 40 બાળકો પણ સામેલ છે. મોરબી નગરપાલિકા સાથેના કરાર હેઠળ ઓરેવા ગ્રુપ બ્રિજનું સંચાલન કરી રહ્યું હતું.