સુરતમાં 3 કૂતરાઓએ માસૂમ પર કર્યો હુમલો: 2 વર્ષની બાળકીના આખા શરીર પર 40 ગંભીર ઘા

સુરત શહેરમાં વધુ એક માસૂમ પર કૂતરાઓએ હુમલો કર્યો છે. બે વર્ષની બાળકી કૂતરાઓના બચ્ચાં સાથે રમતી હતી ત્યારે તેના પર ત્રણ કૂતરાઓએ હુમલો કર્યો હતો. બાળકી પર પહેલા એક કૂતરાએ હુમલો કર્યો હતો. તેને જોઈને અન્ય બે કૂતરાઓએ પણ તેના પર હુમલો કર્યો. ત્રણેય કૂતરાઓએ બાળકી પર એટલો ખતરનાક હુમલો કર્યો કે બાળકીના માથા, પેટ, પીઠ, કમર અને હાથ-પગ પર 40 જેટલા ઘા હતા.

લોહીથી લથપથ બાળકીને સિવિલ હોસ્પિટલના ઈમરજન્સી વોર્ડમાં દાખલ કરવામાં આવી છે. તેની હાલત નાજુક છે. કૂતરાઓના આ હુમલાને કારણે માસૂમ બાળકી બોલી શકતી નથી અને કંઈ ખાઈ પણ શકતી નથી. ડોકટરોએ કહ્યું છે કે તેના માથાની પ્લાસ્ટિક સર્જરી કરવી પડશે.

કુતરા કરડવાથી ઇજાગ્રસ્ત બાળકીને સિવિલ હોસ્પિટલના ઇમરજન્સી વિભાગના સર્જરી વિભાગમાં દાખલ કરવામાં આવી હતી. સારવાર કરી રહેલા ડોક્ટરનું કહેવું છે કે બાળકીની હાલત નાજુક છે. કશું કહી શકાય નહીં. તેને 24 કલાક ઓબ્ઝર્વેશન હેઠળ રાખવામાં આવશે.કૂતરાના હુમલાથી બાળકીને માથામાં ગંભીર ઈજા થઈ છે. તેના માથા પર ઘા હોવાથી પ્લાસ્ટિક સર્જરી કરવામાં આવશે.

શહેરમાં કૂતરા કરડવાના વધતા જતા કેસોને જોતા નવી સિવિલ હોસ્પિટલના ટ્રોમા સેન્ટરમાં હડકવા વિરોધી ચેમ્બર બનાવવામાં આવી છે.દરરોજ 40 થી 50 નવા દર્દીઓ અને 70 થી 75 ફોલોઅપ દર્દીઓ અહીં આવી રહ્યા છે. આ ઉપરાંત 2 થી 3 કેસ પણ ગંભીર છે.દર્દીઓની સંખ્યામાં વધારો થવાને કારણે HIG રસીનો સ્ટોક પૂરો થઈ ગયો હતો.