સુરતમાં ઉત્તરાયણ અને વાસી ઉત્તરાયણ (Uttarayan Festival) દરમિયાન દર વર્ષે પતંગની દોરી જીવલેણ સાબિત થતી હોવાની ઘટનાઓ સામે આવતી રહે છે. તંત્રની કડક કાર્યવાહી અને જનજાગૃતિ અભિયાનો છતાં આ વર્ષે પણ એક નિર્દોષ બાળકે પોતાનો જીવ ગુમાવવો પડ્યો છે. સુરતથી આવેલા આ હૃદયદ્રાવક સમાચાર (Surat Kite Accident) એ તહેવારની ખુશીઓને માતમમાં ફેરવી દીધી છે.
જહાંગીરપુરા વિસ્તારમાં પતંગની કાતિલ દોરી (Manja String) એ એક 8 વર્ષના બાળકનો જીવ લઈ લીધો છે, જેના કારણે સમગ્ર શહેરમાં શોક અને અરેરાટી ફેલાઈ ગઈ છે. આ કરુણ ઘટના સોસાયટીમાં લાગેલા CCTV Footageમાં કેદ થઈ ગઈ છે.પ્રાપ્ત વિગતો મુજબ, જહાંગીરપુરાની આનંદ વિલા સોસાયટીમાં રહેતા અને મૂળ મહારાષ્ટ્રના વતની અમોલભાઈ બોરસેનો 8 વર્ષનો પુત્ર રેહાન્સ આ અકસ્માતનો ભોગ બન્યો હતો. રેહાન્સ પરિવારનો એકનો એક લાડકવાયો દીકરો હતો અને ધોરણ-3માં અભ્યાસ કરતો હતો. તેના પિતા હજીરા વિસ્તારમાં આવેલી એક ખાનગી કંપનીમાં નોકરી કરીને પરિવારનું ગુજરાન ચલાવતા હતા. તહેવારના માહોલમાં બાળકના અકાળ અવસાનથી પરિવાર પર દુઃખનો પહાડ તૂટી પડ્યો છે.
આ દુર્ઘટના 15 જાન્યુઆરીના રોજ બપોરના સમયે બની હતી. રેહાન્સ પોતાની સોસાયટીના કમ્પાઉન્ડમાં નિર્દોષતાથી સાયકલ ચલાવી રહ્યો હતો. એ સમયે આકાશમાંથી કપાયેલી પતંગની દોરી (Cut Kite String) નીચે લટકતી આવી હતી. સાયકલની ગતિમાં બાળકને દોરી દેખાઈ નહીં અને એ કાતિલ દોરી સીધી તેના ગળામાં ફસાઈ ગઈ. સીસીટીવી ફૂટેજમાં સ્પષ્ટ દેખાય છે કે દોરીના ઘર્ષણથી બાળકનું ગળું ગંભીર રીતે કપાઈ જાય છે અને તે ત્યાં જ ઢળી પડીને તરફડવા લાગે છે.
લોહીલુહાણ હાલતમાં બાળકને તાત્કાલિક નજીકની હોસ્પિટલ ખસેડવામાં આવ્યો હતો, પરંતુ ગળાનો ભાગ ઊંડે સુધી કપાઈ જવાથી (Severe Neck Injury) ડોક્ટરો તેને બચાવી શક્યા નહોતા. હોસ્પિટલ પહોંચતા પહેલા જ માસૂમે દમ તોડી દીધો હતો. કાચ પાયેલી માંઝી અને ચાઈનીઝ દોરીઓ (Chinese Manja Ban) રસ્તા પરથી પસાર થતા વાહનચાલકો તેમજ રમતા બાળકો માટે સતત મોતનો ફાંસો બની રહી છે.
આ કરુણ ઘટના વાલીઓ માટે લાલબત્તી સમાન ચેતવણી (Safety Alert for Parents) છે. ઉત્તરાયણના દિવસોમાં જ્યારે હજારો પતંગો આકાશમાં ઉડતા હોય, ત્યારે બાળકોને એકલા બહાર મોકલવું જોખમી બની શકે છે. ખાસ કરીને સાયકલ ચલાવતી વખતે અથવા ચાલતી વખતે કપાયેલી દોરી ગળામાં ફસાઈ જવાની શક્યતા અનેકગણી વધી જાય છે.
