Raghav Chadha એ એક વીડિયો સંદેશ જાહેર કર્યો, જે તેમને Aam Aadmi Party દ્વારા રાજ્યસભાના ઉપનેતા પદ પરથી દૂર કર્યા બાદ આવ્યો છે. પોતાના સંદેશમાં તેમણે સ્પષ્ટ શબ્દોમાં કહ્યું કે, “મને ચૂપ કરવામાં આવ્યો છે, પરંતુ હું હાર્યો નથી.”
રાઘવ ચઢ્ઢાએ વીડિયોમાં શું કહ્યું?
રાઘવ ચઢ્ઢાએ પોતાના સંદેશમાં સામાન્ય જનતા અને પોતાની પાર્ટી બંનેને સંબોધિત કર્યા. તેમણે કહ્યું કે સંસદમાં જ્યારે પણ તેમને બોલવાનો મોકો મળ્યો છે, ત્યારે તેમણે હંમેશા લોકોના પ્રશ્નો અને જાહેર હિતના મુદ્દાઓ ઉઠાવ્યા છે. તેમણે સવાલ ઉઠાવ્યો કે શું સામાન્ય લોકોની સમસ્યાઓ વિશે વાત કરવી ગુનો છે? શું તેમણે કોઈ ભૂલ કરી છે? તેમણે આગળ કહ્યું કે, “હું આજે આ પ્રશ્ન પૂછું છું કારણ કે મારી જ પાર્ટીએ રાજ્યસભા સચિવાલયને જાણ કરી છે કે રાઘવ ચઢ્ઢાને સંસદમાં બોલવાની તક ન આપવામાં આવે.” તેમણે આ વાત પર આશ્ચર્ય વ્યક્ત કરતા કહ્યું કે, “કોઈ મને કેમ રોકવા માંગે છે? મારો અવાજ કેમ દબાવવા માંગે છે?”
રાઘવે પોતાના સંદેશમાં જણાવ્યું કે તેમણે સંસદમાં ઘણા એવા મુદ્દાઓ ઉઠાવ્યા છે, જે સીધા સામાન્ય માણસ સાથે જોડાયેલા છે. તેમાં મોંઘું એરપોર્ટ ફૂડ, ડિલિવરી રાઇડર્સની સમસ્યાઓ, ખાદ્ય પદાર્થોમાં ભેળસેળ, ટોલ પ્લાઝા પરની ગેરરીતિઓ, બેંક ચાર્જિસ, મધ્યમ વર્ગ પર ટેક્સનો બોજ, તેમજ ટેલિકોમ કંપનીઓની નીતિઓ જેવા મુદ્દાઓનો સમાવેશ થાય છે.
તેમણે કહ્યું કે આ મુદ્દાઓ ઉઠાવવાથી જનતાને ફાયદો થયો છે, પરંતુ પાર્ટીને શું નુકસાન થયું છે તે સમજાતું નથી. “જો હું લોકોના હિતમાં બોલું છું, તો મને કેમ રોકવામાં આવી રહ્યો છે?” એવો સવાલ પણ તેમણે કર્યો.
રાઘવ ચઢ્ઢાએ પોતાના સંદેશમાં જનતાનો આભાર માન્યો અને કહ્યું કે લોકોના પ્રેમ અને ટેકાથી જ તેઓ હંમેશા મજબૂત રહ્યા છે. તેમણે લોકોને અપીલ કરી કે તેઓ તેમનો સાથ જાળવી રાખે અને તેમનો હાથ ન છોડે.અંતમાં તેમણે ખૂબ જ ભાવનાત્મક શબ્દોમાં કહ્યું, “હું હંમેશા તમારી સાથે છું. આજે મારી બોલવાની છૂટ છીનવી લેવામાં આવી છે, પરંતુ મારા મૌનને મારી હાર તરીકે ન જોતા. હું લડતો રહીશ.”
