અભિનેતા અને સમાજસેવી સોનુ સૂદની બહેન માલવિકા સૂદ સોમવારે અહીં કોંગ્રેસમાં જોડાઈ હતી. આ અવસર પર કોંગ્રેસ પંજાબ યુનિટના અધ્યક્ષ નવજોત સિંહ સિદ્ધુએ કહ્યું કે 14 ફેબ્રુઆરીએ યોજાનારી વિધાનસભા ચૂંટણી પહેલા આ એક મહત્વપૂર્ણ ઘટના છે. માલવિકા પંજાબના મુખ્યમંત્રી ચરણજીત સિંહ ચન્ની અને સિદ્ધુની હાજરીમાં પાર્ટીમાં જોડાઈ હતી. સિદ્ધુએ કહ્યું, “એવું બહુ જ દુર્લભ છે કે પાર્ટીના વડા અને મુખ્યમંત્રી બંને આ સન્માન આપવા માટે કોઈના ઘરે ગયા હોય, તે તેના હકદાર છે.”
માલવિકાને કોંગ્રેસમાં સામેલ કરવાનો કાર્યક્રમ પંજાબના મોગા જિલ્લામાં તેમના ઘરે યોજાયો હતો. અભિનેતા સૂદે ગયા વર્ષે નવેમ્બરમાં કહ્યું હતું કે તેની બહેન રાજકારણમાં જોડાશે. જ્યારે તેમને પૂછવામાં આવ્યું કે શું માલવિકા સૂદ મોગા વિધાનસભા સીટ પરથી કોંગ્રેસના ઉમેદવાર બની શકે છે, ત્યારે ચન્નીએ સંકેત આપ્યો કે તે પાર્ટીની પસંદગી હશે.
માલવિકાનું કોંગ્રેસમાં સ્વાગત કરતાં સિદ્ધુએ કહ્યું કે અમારા માટે ખૂબ જ આનંદની વાત છે કે એક એનજીઓ ચલાવીને પોતાનું નામ કમાવનાર અને લોકોની સેવામાં પોતાને સમર્પિત કરનાર એક મહિલા અમારી પાર્ટીમાં જોડાય છે. આ પ્રસંગે, માલવિકાએ કહ્યું કે તે લોકોની સેવામાં પોતાને સમર્પિત કરવા માટે રાજકારણમાં આવી છે.
જણાવી દઈએ કે માલવિકા સૂદ પંજાબના મોગા વિધાનસભા ક્ષેત્રમાં સતત પ્રચાર કરી રહી છે અને માનવામાં આવે છે કે કોંગ્રેસ પાર્ટી તેમને મોગા વિધાનસભા સીટથી જ ટિકિટ આપશે. કોંગ્રેસમાં જોડાતા પહેલા કોંગ્રેસના મોગા વિધાનસભા ક્ષેત્રના કાર્યકરો પ્રચારમાં માલવિકા સૂદનું સમર્થન કરી રહ્યા હતા.
