રાજસ્થાનના જેસલમેર જિલ્લામાંથી મોટા સમાચાર સામે આવ્યા છે. શહેરમાં વહેલી સવારે એક ભયાનક માર્ગ અકસ્માત સર્જાયો હતો. આ દુર્ઘટનામાં અત્યાર સુધીમાં 4 લોકોના મોત થયા છે જ્યારે 7 અન્ય લોકોની હાલત અત્યંત ગંભીર છે. કારમાં મુસાફરી કરી રહેલ 11 લોકોનો પરિવાર રામદેવરા દર્શન કરીને પરત ફરી રહ્યો હતો ત્યારે સામેથી આવતા ટેન્કરે કારને અડફેટે લેતા આ અકસ્માત સર્જાયો હતો. 4 લોકોએ સ્થળ પર જ જીવ ગુમાવ્યા.
સમગ્ર ઘટના અંગે જેસલમેર જિલ્લાના ઝંવર પોલીસ સ્ટેશનના અધિકારીએ જણાવ્યું કે આ અકસ્માત લોહરી દેજગરા ગામમાં હાઈવે પર થયો હતો. આ પરિવાર મૂળ રાજસ્થાનના નાગૌર જિલ્લાનો છે. નાગૌર જિલ્લાના ડીડવાના વિસ્તારમાં રહેતા પરિવારના તમામ સભ્યો શનિવારે બપોરે બાબા રામદેવને શ્રદ્ધાંજલિ આપવા માટે રામદેવરા ધામ ગયા હતા. મોડી રાત્રે ત્યાંથી પરત ફરતી વખતે આ ઘટના બની હતી.
કારમાં સવાર પરિવારના કેટલાક સભ્યો જોધપુર જિલ્લાના રહેવાસી પણ હતા, જેથી પરિવારના તમામ સભ્યો જોધપુર જિલ્લામાં પરત ફરી રહ્યા હતા. પરંતુ જેસલમેરથી બહાર નીકળતી વખતે સામેથી આવી રહેલા ડીઝલ ભરેલા ટેન્કરે કારને ટક્કર મારી હતી અને ટેન્કર કારની આગળના ભાગ પરથી પસાર થઈ ગયું હતું.
આ માર્ગ અકસ્માતમાં દ્રૌપદી, રાજુ દેવી, કાર ચાલક નરપત અને 10 વર્ષના જસવંતનું મોત થયું છે. કારમાં અન્ય મુન્ની દેવી, સપના દેવી, અંજલિ, પવન, મહાવીર, લકી, જ્યોતિ ઘાયલ છે. આ 7 લોકોમાંથી 5 એવા બાળકો છે જેમની ઉંમર 8 વર્ષથી 12 વર્ષની વચ્ચે જણાવવામાં આવી છે. કારનો ડ્રાઈવર નરપતસિંહ કાર ચલાવી રહ્યો હતો.
