યુકેની કોર્ટ ભાગેડુ દારૂ ઉદ્યોગપતિ વિજય માલ્યાના ભારત પ્રત્યાર્પણની સુનાવણી કરી રહી છે. આવી સ્થિતિમાં માલ્યાએ ફરી એક વખત સરકારને તેના 100 ટકા દેવાની ચુકવણીના પ્રસ્તાવને સ્વીકારવા અને તેની સામેનો કેસ બંધ કરવા જણાવ્યું છે.
20 લાખ કરોડના આર્થિક પેકેજની ઘોષણા પર માલ્યાએ સરકારને અભિનંદન પાઠવ્યા હતા. તેમણે કહ્યું કે મારી લોન સતત ચુકવવાના પ્રસ્તાવની અવગણના કરવામાં આવી રહી છે. માલ્યાએ ટ્વીટ કર્યું હતું કે ‘કોવિડ -19 રાહત પેકેજ આપવા બદલ સરકારને અભિનંદન. તેઓ ઇચ્છે તેટલું ચલણ (રૂપિયા) છાપી શકે છે, પરંતુ શું મારા જેવા નાના ફાળો આપનારાઓએ બેંકોમાંથી લીધેલ લોનની 100 ટકા રકમ પાછા આપવાની ઓફરની ઉપેક્ષા કરવી જોઈએ ?
કિંગફિશર એરલાઇન્સના પ્રમોટર માલ્યા પર ભારતમાં છેતરપિંડી અને મની લોન્ડરિંગ હેઠળ કેસ દાખલ કરાયો છે. તે નવ હજાર કરોડ રૂપિયાના કેસમાં વોન્ટેડ છે. તેમણે સરકારને બિનશરતી પૈસા લીધા વિના નોંધાયેલા કેસને બંધ કરવા જણાવ્યું છે. લંડન હાઇકોર્ટમાં હારનો સામનો કર્યા બાદ માલ્યાએ આ મહિનાની શરૂઆતમાં યુકે સુપ્રીમ કોર્ટમાં પ્રત્યાર્પણ વિરુદ્ધ અપીલ દાખલ કરી હતી.
હાઇ કોર્ટમાં માલ્યાની અપીલ નકાર્યા બાદ હવે તેમની પાસે બ્રિટિશ સુપ્રીમ કોર્ટમાં અપીલ કરવા માટે 14 દિવસનો સમય હતો. માલ્યા માર્ચ 2016 થી યુકેમાં છે અને પ્રત્યાર્પણ વોરંટ પર ધરપકડના પગલે એપ્રિલ 2017 થી જામીન પર છે. પ્રત્યાર્પણના કેસમાં ભારતીય તપાસ એજન્સીઓનું પ્રતિનિધિત્વ કરનાર યુકે ક્રાઉન પ્રોસીક્યુશન સર્વિસના પ્રવક્તાએ પણ માલ્યા પાસેથી અરજી મેળવવાની પુષ્ટિ કરી છે.
માલ્યાએ અગાઉ કહ્યું હતું કે મારા અને અન્ય લોકો સામેના આક્ષેપો 2009 માં આઈડીબીઆઈ બેંક તરફથી રૂ. 9000 કરોડની લોનના ફક્ત ત્રણ હપ્તાના જ હતા. માલ્યાએ આ સંદર્ભે લંડન હાઈકોર્ટના આદેશનો પણ હવાલો આપ્યો હતો.
