ટીમ ઈન્ડિયાના સ્ટાર બેટ્સમેન વિરાટ કોહલીને લઈને મોટા સમાચાર સામે આવ્યા છે. તેની પત્ની અને બોલિવૂડ અભિનેત્રી અનુષ્કા શર્માએ પુત્રને જન્મ આપ્યો છે. વિરાટ કોહલી ફરી એક વખત પિતા બન્યા છે. પૂર્વ કેપ્ટન વિરાટ કોહલી દ્વારા પોતાના સોશિયલ મીડિયા દ્વારા આ જાણકારી આપવામાં આવી હતી. બેટ્સમેન વિરાટ કોહલી દ્વારા પોતાના ઈન્સ્ટાગ્રામ એકાઉન્ટ પર જણાવવામાં આવ્યું છે કે, 15 ફેબ્રુઆરીના રોજ તેની પત્નીએ એક પુત્રને જન્મ આપ્યો છે. તેનું નામે ‘અકાય’ રાખવામાં આવ્યું છે.
વિરાટ કોહલી આ પોસ્ટમાં લખ્યું છે કે, “અમને એ જણાવતા અત્યંત આનંદ થઈ રહ્યો છે કે, 15 ફેબ્રુઆરીએ અમે અમારા પુત્ર અકાય અને વામિકાના નાના ભાઈને આ દુનિયામાં આવકાર્યા છે. અમે અમારા જીવનના આ સુંદર સમય દરમિયાન તમારા આશીર્વાદ અને શુભેચ્છાઓ ઈચ્છીએ છીએ.” અમે તમને વિનંતી કરીએ છીએ. અમારી ગોપનીયતાનો તમે આદર કરો.” ભૂતપૂર્વ ભારતીય કેપ્ટનની આ પોસ્ટ પર અભિનંદનનો વરસાદ શરુ થઈ ગયો છે. ક્રિકેટ જગતના તમામ દિગ્ગજો દ્વારા કમેન્ટ કરીને તેમને શુભકામનાઓ આપવામાં આવી રહી છે.
View this post on Instagram
વિરાટ કોહલીની વાત કરીએ તો તેમણે 2017 માં અનુષ્કા શર્મા સાથે લગ્ન કર્યા હતા. લગ્ન પહેલા બંનેએ એકબીજાને લાંબા સમય સુધી ડેટ કર્યા હતા. 2021 માં, બંનેએ એક સુંદર પુત્રીને જન્મ આપ્યો હતો. વિરાટ અને અનુષ્કાની દીકરીનું નામ વામિકા છે. વિરાટ હાલમાં ભારત વિરુદ્ધ ઈંગ્લેન્ડ શ્રેણીનો ભાગ રહેલ નથી. તેમણે અંગત કારણોસર આ શ્રેણીમાંથી રજા લીધી હતી. વિરાટ કોહલી દ્વારા ભારત માટે 113 ટેસ્ટ, 292 ODI અને 117 T20 આંતરરાષ્ટ્રીય મેચ રમી છે. જેમાં તેણે અનુક્રમે 8848, 13848 અને 4037 રન બનાવ્યા છે.
