કોવિડ -19 રોગચાળાને કારણે સમગ્ર વિશ્વમાં લાંબા લોકડાઉન થયા અને પરિણામે લાખો લોકોના મોત થયા. લગભગ 4 વર્ષ પછી આ રોગચાળામાંથી વિશ્વ બહાર આવી ગયું છે ત્યારે વધુ એક વાયરસે સમગ્ર વિશ્વમાં ચિંતા વધારી દીધી છે.જીવલેણ કોવિડ -19 વાયરસ ફાટી નીકળ્યાના ચાર વર્ષ પછી ચીન બીજા વાયરસ સામે લડી રહ્યું છે. આ હ્યુમન મેટાપ્યુમોવાયરસ (HMPV) નામનો વાયરસ છે.
આ વાયરસના કારણે ઘણા દેશો તેના ફેલાવા પર નજર રાખી રહ્યા છે. દુનિયાની સાથે ભારતે પણ આની દેખરેખ શરૂ કરી દીધી છે. હવે ગુજરાતના અમદાવાદમાં પણ 2 મહિનાના એક બાળકનો રિપોર્ટ Positive આવ્યો છે. આ ઉપરાંત બેંગલુરુની એક હોસ્પિટલમાં આઠ મહિનાની બાળકીમાં HMPV વાયરસ મળી આવ્યો છે. આરોગ્ય વિભાગનું કહેવું છે કે, ‘અમે અમારી લેબમાં તેનું પરીક્ષણ કર્યું નથી. આ રિપોર્ટ ખાનગી હોસ્પિટલનો છે. ભારતમાં હાલ 3 કેસ સામે આવ્યા છે.
આરોગ્ય નિષ્ણાતોએ HMPV પર ચિંતા વ્યક્ત કરી છે, જે એક શ્વસન વાયરસ છે જે ઘણા એશિયન દેશોને અસર કરી રહ્યો છે. રોઇટર્સમાં પ્રકાશિત એક અહેવાલ અનુસાર તાજેતરમાં શોધાયેલા કેસોમાં રાઇનોવાયરસ અને હ્યુમન મેટાપ્યુમોવાયરસ જેવા પેથોજેન્સનો સમાવેશ થાય છે. ખાસ કરીને ચીનના ઉત્તરી પ્રાંતોમાં 14 વર્ષથી ઓછી ઉંમરના લોકોમાં માનવ મેટાપ્યુમોવાયરસના કેસોમાં વધારો જોવા મળી રહ્યો છે.
જો કે આ ચેપમાં વધારાની તપાસ કરવામાં આવી રહી છે કારણ કે શિયાળાની ઋતુ ચાલી રહી છે અને આ ચેપ સામાન્ય શ્વસન રોગો (શરદી, ઉધરસ, શરદી) જેવો જ છે જે શિયાળાની ઋતુમાં ફેલાય છે. રિપોર્ટ અનુસાર, HMPV ઈન્ફલ્યુએન્ઝા A, માયકોપ્લાઝમા ન્યુમોનિયા અને COVID-19 જેવા ઘણા વાયરસ સાથે ઝડપથી ફેલાઈ શકે છે.
