જો AAPને જગ્યા આપી તો દુકાનો તોડી પાડીશું, સુરતના આપના ઉમેદવાર પાયલ સાકરિયાએ ભાજપ પર લગાવ્યા આરોપ

સ્થાનિક સ્વરાજ્યની ચૂંટણીનો માહોલ ગરમાતા સુરતના વોર્ડ નંબર 16માંથી Aam Aadmi Partyના ઉમેદવાર અને પૂર્વ કોર્પોરેટર પાયલ સાકરિયાએ સત્તાધારી Bharatiya Janata Party પર ગંભીર આક્ષેપો કર્યા છે. તેમણે જણાવ્યું કે ભાજપ ડર અને ધમકીની રાજનીતિ કરીને મતદારો અને કાર્યકર્તાઓ પર દબાણ બનાવી રહી છે.

પાયલ સાકરિયાના જણાવ્યા અનુસાર, 2021થી અત્યાર સુધી તેઓ સતત લોકોની વચ્ચે રહી સેવા કરતા આવ્યા છે. સુરત મહાનગરપાલિકામાં વિરોધ પક્ષ તરીકે રહીને તેમણે વિસ્તારમાં કરોડો રૂપિયાના વિકાસ કામો કરાવ્યા છે. તેમણે દાવો કર્યો કે જે કામો ભાજપના 30 વર્ષના શાસનમાં થયા નહોતા, તે કામો તેમની ટીમે માત્ર 5 વર્ષમાં પૂર્ણ કર્યા છે, જેને કારણે ભાજપમાં અસ્વસ્થતા જોવા મળી રહી છે.

તેમણે વધુમાં કહ્યું કે 2026ની ચૂંટણીમાં ફરી ઉમેદવારી નોંધાવતા તેમને લોકોનો ભારે સમર્થન મળી રહ્યો છે. છેલ્લા પાંચ વર્ષમાં આશરે ₹380 કરોડના વિકાસ કામો કરાવ્યાનો દાવો કરતા તેમણે કહ્યું કે ભાજપ હવે તેમના કાર્યકર્તાઓને લલચાવવાનો પ્રયાસ કરી રહી છે.

પાયલ સાકરિયાએ આરોપ લગાવ્યો કે જે લોકો આમ આદમી પાર્ટીને કાર્યાલય માટે જગ્યા આપે છે, તેમને ભાજપના લોકો દ્વારા ધમકાવવામાં આવે છે. “જો કાર્યાલય માટે જગ્યા આપશો તો દુકાન તોડી નાખીશું, ધંધો બંધ કરાવી દેશું,” જેવી ધમકીઓ આપવામાં આવતી હોવાનો તેમણે આક્ષેપ કર્યો. તેમણે જણાવ્યું કે આવી ગુંડાગીરીથી મત મળવાના નથી અને આવનારી ચૂંટણીમાં લોકો યોગ્ય જવાબ આપશે. “લોકશાહીને દબાવવાનો પ્રયાસ થઈ રહ્યો છે, પરંતુ જનતા બધું જોઈ રહી છે,” એમ તેમણે કહ્યું.

પરિવર્તનની રાજનીતિનો દાવો:

પાયલ સાકરિયાએ કહ્યું કે તેઓ રાજનીતિ બદલવા અને સિસ્ટમમાં પારદર્શિતા લાવવા માટે મેદાનમાં ઉતર્યા છે. યુવાનો મોટી સંખ્યામાં પાર્ટી સાથે જોડાઈ રહ્યા હોવાનું જણાવતાં તેમણે કહ્યું કે છેલ્લા પાંચ વર્ષમાં “કામની રાજનીતિ” કરીને બતાવી છે.

તેમણે અંતમાં કહ્યું કે આજે ભાજપના નેતાઓને પણ વિસ્તારમાં ફરીને કામોની વાત કરવી પડી રહી છે, જે દર્શાવે છે કે વિકાસના મુદ્દે લોકો હવે વધુ જાગૃત બન્યા છે.