આજના સમયમાં દરેક ઘરમાં એટેચ્ડ બાથરૂમ સામાન્ય બાબત બની ગઈ છે, પરંતુ તેની ખોટી દિશા અથવા ગોઠવણ તમારા આરામ અને માનસિક શાંતિ પર અસર કરી શકે છે. વાસ્તુ શાસ્ત્ર મુજબ, બાથરૂમનો દરવાજો પલંગની સીધી સામે હોવો શુભ માનવામાં આવતો નથી, કારણ કે તે રૂમની સકારાત્મક ઉર્જાને ઘટાડે છે.
જો પલંગ બાથરૂમના દરવાજા સામે હોય, તો ઊંઘની ગુણવત્તા પર અસર થઈ શકે છે. આવી સ્થિતિમાં વ્યક્તિને થાક, તણાવ અને બેચેની જેવી સમસ્યાઓ અનુભવાય છે. તેથી શક્ય હોય તો પલંગને એવી રીતે ગોઠવો કે બાથરૂમનો દરવાજો સીધો નજરે ન પડે.
બાથરૂમની દિવાલ સાથે પલંગ કેમ ન રાખવો?
વાસ્તુ મુજબ પલંગ બાથરૂમની દિવાલને અડીને રાખવો પણ યોગ્ય નથી. આથી શરીરને પૂરતો આરામ મળતો નથી અને દિવસભર થાકનો અનુભવ થઈ શકે છે. પલંગ અને દિવાલ વચ્ચે થોડું અંતર રાખવું વધુ લાભદાયી ગણાય છે.
સરળ વાસ્તુ ઉપાયો
જો રૂમમાં આવી ગોઠવણ પહેલેથી જ હોય, તો નીચેના સરળ ઉપાયો અપનાવી શકાય:
બાથરૂમનો દરવાજો શક્ય હોય ત્યાં સુધી બંધ રાખો, જેથી નકારાત્મક ઉર્જા બહાર ન ફેલાય.બાથરૂમમાં મીઠાનો બાઉલ રાખવાથી આસપાસની નકારાત્મકતા ઘટાડવામાં મદદ મળે છે.રૂમ અને બાથરૂમમાં યોગ્ય હવા ફરતી રહે તે માટે બારી કે એક્ઝોસ્ટ ફેનનો ઉપયોગ કરો.બાથરૂમ હંમેશા સ્વચ્છ અને સુગંધિત રાખો, જેથી તાજગી અને સકારાત્મક વાતાવરણ જળવાઈ રહે.
સાચી દિશા શું હોવી જોઈએ?
વાસ્તુ મુજબ બાથરૂમ માટે વાયવ્ય (ઉત્તર-પશ્ચિમ) અથવા પશ્ચિમ દિશા શ્રેષ્ઠ માનવામાં આવે છે. જ્યારે ઈશાન (ઉત્તર-પૂર્વ) દિશામાં બાથરૂમ બનાવવાનું ટાળવું જોઈએ, કારણ કે તે ઘરની ઊર્જા પર નકારાત્મક અસર કરી શકે છે.
