કેનેડા-ભારત વિવાદ અંગે મોટા સમાચાર: કેનેડાના પ્રધાનમંત્રીએ કહ્યું, અમે ઘણા સમય પહેલા જ ભારતને માહિતી આપી દીધી હતી કે…

કેનેડાના વડા પ્રધાન જસ્ટિન ટ્રુડોએ શુક્રવારે કહ્યું હતું કે તેમની સરકારે કેટલાક અઠવાડિયા પહેલા ખાલિસ્તાની આતંકવાદી હરદીપ સિંહ નિજ્જરની હત્યાના મામલામાં ભારત સાથે ગુપ્ત માહિતી શેર કરી હતી.ટ્રુડોએ કહ્યું કે કેનેડા આ મામલે ભારત સાથે રચનાત્મક રીતે કામ કરવા માંગે છે. ટ્રુડોએ યુક્રેનના રાષ્ટ્રપતિ વોલોડીમિર ઝેલેન્સકીનું કેનેડામાં સ્વાગત કર્યા બાદ પ્રેસ કોન્ફરન્સમાં આ વાત કહી.

ટ્રુડોએ કહ્યું, “અમે કેટલાંક અઠવાડિયા પહેલા ભારત સાથે વિશ્વાસપાત્ર આરોપ સાથે સંબંધિત માહિતી શેર કરી હતી જેના વિશે મેં સોમવારે વાત કરી હતી. અમે ભારત સાથે રચનાત્મક રીતે કામ કરવા માટે આતુર છીએ. અમને આશા છે કે તેઓ અમારી સાથે જોડાશે.ગયા સોમવારે કેનેડાના પીએમ જસ્ટિન ટ્રુડોએ જૂનમાં ખાલિસ્તાની આતંકવાદી હરદીપ સિંહ નિજ્જરની હત્યાના મામલામાં સંસદમાં ભારત પર ગંભીર આરોપ લગાવ્યા હતા.

તેણે કહ્યું હતું કે કેનેડિયન તપાસ એજન્સીને આ હત્યામાં ભારતીય એજન્ટોની સંડોવણીની માહિતી મળી છે. ભારતે આ આરોપને ફગાવી દીધો હતો અને કહ્યું હતું કે તે ‘વાહિયાત’ અને ‘પ્રેરિત’ છે. જસ્ટિન ટ્રુડોએ આરોપ લગાવ્યા બાદથી ભારત અને કેનેડા વચ્ચેના સંબંધો ખૂબ જ ખરાબ થયા છે. સોમવારે જ કેનેડાએ એક ભારતીય રાજદ્વારીને હાંકી કાઢ્યા હતા.

તેના જવાબમાં ભારતે પણ કેનેડાના રાજદ્વારીને દેશ છોડવાનો આદેશ આપ્યો હતો. એટલું જ નહીં, ભારતે આગળ વધીને કેનેડિયન નાગરિકો માટે ભારતીય વિઝા બંધ કરી દીધા છે.આ વર્ષે જૂનમાં કેનેડાના સરેમાં ગુરુદ્વારા બહાર હરદીપ સિંહ નિજ્જરની ગોળી મારીને હત્યા કરવામાં આવી હતી. નિજ્જર વોન્ટેડ આતંકવાદી હતો. તે પ્રતિબંધિત સંગઠન ખાલિસ્તાન ટાઈગર ફોર્સ (KTF)નો ચીફ હતો.