દેશની સૌથી મોટી જાહેર ક્ષેત્રની બેંક સ્ટેટ બેંક ઓફ ઈન્ડિયાની નવી ફિક્સ્ડ ડિપોઝિટ સ્કીમ (FD સ્કીમ) શાનદાર છે. આમાં બેંક 7 ટકાથી વધુના દરે વ્યાજ આપશે. ફિક્સ્ડ ડિપોઝિટ પર વ્યાજ દરો વધારવાની સાથે, SBIએ નવી રિટેલ FD સ્કીમ શરૂ કરી. તેનું નામ છે ‘અમૃત કલશ ડિપોઝિટ સ્કીમ’ (SBI Amrit Kalash Scheme). આ FD સ્કીમ હેઠળ રોકાણ કરનારાઓને બેંક 7.10 ટકાના દરે વ્યાજ આપશે. આ સિવાય વરિષ્ઠ નાગરિકોને આ અંતર્ગત 7.60 ટકાના દરે વ્યાજ મળશે.
SBI Amrit Kalash Scheme : અમૃત કલાશ ડિપોઝિટ સ્કીમ નામની આ સ્કીમ 15 ફેબ્રુઆરી, 2023થી રોકાણકારો માટે ઉપલબ્ધ છે અને તે 31 માર્ચ, 2023 સુધી માન્ય રહેશે. નવી યોજના 400 દિવસમાં પરિપક્વ થશે. એટલે કે, તમારે આ સ્કીમ હેઠળ 400 દિવસ માટે રોકાણ કરવું પડશે. જો સામાન્ય રોકાણકારો આ સ્કીમ હેઠળ રૂ. 1 લાખનું રોકાણ કરે છે, તો તેમને વ્યાજ તરીકે વાર્ષિક રૂ. 8,017 મળશે. તે જ સમયે, વરિષ્ઠ નાગરિકોને વ્યાજ તરીકે 8,600 રૂપિયા મળશે.
રિઝર્વ બેંક ઓફ ઈન્ડિયાના રેપો રેટમાં વધારો કર્યા બાદ દેશની ખાનગી અને સરકારી બેંકો પોતાની ફિક્સ ડિપોઝીટને આકર્ષક બનાવવા માટે વ્યાજ દરોમાં સતત વધારો કરી રહી છે. ફેબ્રુઆરીમાં જ સ્ટેટ બેંક ઓફ ઈન્ડિયાએ રૂ. 2 કરોડથી ઓછી ફિક્સ્ડ ડિપોઝિટ પર વ્યાજ દર 5 બેસિસ પોઈન્ટથી વધારીને 25 બેસિસ પોઈન્ટ કર્યા હતા.
આ નવા વ્યાજ દરો 15 ફેબ્રુઆરી 2023થી લાગુ થશે. વરિષ્ઠ નાગરિકો માટેના વ્યાજ દરો સામાન્ય રોકાણકારોને ઓફર કરવામાં આવતા દરો કરતા 25 બેસિસ પોઈન્ટ વધારે છે. સ્ટેટ બેંકે બે વર્ષથી ત્રણ વર્ષથી ઓછી એફડી પરના વ્યાજ દરમાં 25 બેસિસ પોઈન્ટનો વધારો કર્યો છે. હવે વ્યાજ દર 6.75 ટકાથી વધીને 7 ટકા થઈ ગયો છે.
10 વર્ષની FD પર કેટલું વ્યાજ મળશે? બેંકે 3 વર્ષથી 10 વર્ષ સુધીની FD સ્કીમ પર વ્યાજ દર 6.25 ટકાથી વધારીને 6.50 ટકા કર્યો છે. 7 થી 45 દિવસની એફડી પર 3.00 ટકાના દરે વ્યાજ મળશે. 46 થી 179 દિવસની સ્કીમ માટે નવો વ્યાજ દર 4.05 ટકા છે, જ્યારે 180-210 દિવસની FD માટે દર 5.25 ટકા છે. 211-1 વર્ષથી ઓછી એફડી પર હવે વાર્ષિક 5.75%ના દરે વ્યાજ મળશે.
