SIM card rules : નવા વર્ષને આડે હવે થોડો સમય બાકી છે. 2023માં કૌભાંડ, સ્પામ, છેતરપિંડી, ઓનલાઈન છેતરપિંડીના ઘણા મામલા પ્રકાશમાં આવ્યા હતા. હવે નવા વર્ષમાં આ તમામ બાબતોને પહોંચી વળવા માટે સરકારે સંપૂર્ણ તૈયારીઓ કરી લીધી છે. સરકારે એક નવું ટેલિકોમ્યુનિકેશન બિલ રજૂ કર્યું છે અને આ બિલમાં સિમ કાર્ડની ખરીદી અને વેચાણ અંગે કડક નિયમો નક્કી કરવામાં આવ્યા છે. સિમ કાર્ડ ખરીદવા માટેના નવા નિયમો 1 જાન્યુઆરી, 2024થી અમલમાં આવશે. હવે સિમ ખરીદવું પહેલા જેવું સરળ નહીં હોય.
ભારતમાં સ્માર્ટફોન યુઝર્સની સતત વધતી જતી સંખ્યા સાથે, ઓનલાઈન છેતરપિંડી અને કૌભાંડોના કેસોમાં પણ ઝડપથી વધારો થયો છે. હવે સરકાર આના પર કડક કાર્યવાહી કરવા જઈ રહી છે. સિમ ખરીદવાના નવા નિયમો નવા વર્ષથી અમલમાં આવશે. સરકારે નવા બિલમાં સ્પષ્ટ કર્યું છે કે જો કોઈ નકલી સિમ ખરીદે છે તો તેને 3 વર્ષની જેલ અને 50 લાખ રૂપિયા સુધીના દંડની સજા થઈ શકે છે.
નવા ટેલિકોમ્યુનિકેશન બિલમાં, ટેલિકોમ કંપનીઓને સિમ ખરીદનારા દરેક ગ્રાહકનો બાયોમેટ્રિક ડેટા ફરજિયાત રીતે એકત્રિત કરવાની કડક સૂચના આપવામાં આવી છે. જો કોઈ વ્યક્તિ છેતરપિંડી કરીને સિમ કાર્ડ ખરીદે છે તો તેની સામે કડક કાર્યવાહી થઈ શકે છે.
1 જાન્યુઆરી, 2024થી દેશમાં સિમ માત્ર ડિજિટલ KYC દ્વારા જ ઉપલબ્ધ થશે. એટલું જ નહીં વેરિફિકેશન સિસ્ટમમાં પણ મોટો ફેરફાર કરવામાં આવ્યો છે. સિમ વેન્ડરોનું વેરિફિકેશન પણ ફરજિયાત કરવામાં આવ્યું છે. નવા વર્ષ પછી કોઈને જથ્થાબંધ સિમ આપવામાં આવશે નહીં. જોકે, આ નિયમ વ્યાપારી હેતુઓ પર લાગુ થશે નહીં.
સિમ ખરીદવા અને વેચવા માટેના નવા નિયમો હેઠળ હવે ટેલિકોમ ફ્રેન્ચાઈઝી, સિમ ડિસ્ટ્રીબ્યુટર્સ અને પોઈન્ટ ઓફ સેલ એજન્ટ્સનું રજીસ્ટ્રેશન ફરજિયાત હશે. જો કોઈ ડીલર નવા ટેલિકોમ નિયમોની અવગણના કરે છે, તો તેના પર 10 લાખ રૂપિયા સુધીનો ભારે દંડ થઈ શકે છે.
