ટીમ ઈન્ડિયાએ શ્રીલંકા સામેની ત્રણ મેચની ટી-20 શ્રેણી 2-1થી જીતી લીધી છે. શનિવારે રાજકોટમાં રમાયેલી મેચમાં હાર્દિક પંડ્યાની આગેવાની હેઠળની ટીમે શ્રીલંકાને 91 રને હરાવ્યું હતું. ભારતે શ્રીલંકાને જીતવા માટે 229 રનનો ટાર્ગેટ આપ્યો હતો, પરંતુ તેની આખી ટીમ 137 રનમાં જ ઓલઆઉટ થઈ ગઈ હતી. હવે બંને ટીમો વચ્ચે ત્રણ મેચની વનડે શ્રેણી છે, જેની પ્રથમ મેચ 10 જાન્યુઆરીએ રમાશે.
ત્રીજી T20 મેચમાં ભારતીય ટીમની જીતનો હીરો સ્ટાર બેટ્સમેન Suryakumar Yadav રહ્યો હતો. ચોથા સ્થાને બેટિંગ કરવા ઉતરેલા સૂર્યકુમારે શ્રીલંકાના બોલરોને જબરદસ્ત માત આપતા 51 બોલમાં 112 રન બનાવ્યા હતા. સૂર્યકુમાર યાદવે તેની અણનમ ઇનિંગમાં 9 છગ્ગા અને સાત ચોગ્ગા ફટકાર્યા હતા. સૂર્યકુમાર યાદવની ટી20 આંતરરાષ્ટ્રીય કારકિર્દીની આ ત્રીજી સદી હતી.
સૂર્યકુમાર યાદવની ટી-20 ઈન્ટરનેશનલમાં પ્રથમ સદી ગયા વર્ષે જુલાઈમાં નોટિંગહામના મેદાન પર બની હતી. ત્યારબાદ તેણે ઈંગ્લેન્ડ સામે 117 રનની ઈનિંગ રમી હતી. ત્યારબાદ નવેમ્બર 2022 માં, સૂર્યકુમાર યાદવે માઉન્ટ મૌંગાનુઇ ખાતે ન્યુઝીલેન્ડ સામે અણનમ 111 રન બનાવ્યા.
એટલે કે સૂર્યકુમારે પહેલા ઈંગ્લેન્ડ, પછી ન્યુઝીલેન્ડ અને હવે પોતાના ઘરે ટી20 ઈન્ટરનેશનલમાં સદી ફટકારી છે. સૂર્યકુમાર યાદવ હાલમાં ICC T20 રેન્કિંગમાં નંબર-1 બેટ્સમેન છે. શ્રીલંકા સામે સદી ફટકારીને સૂર્યાએ ફરી એકવાર ખુલાસો કર્યો છે કે તેને નંબર-1 રેન્કિંગ કેમ મળ્યું છે.
