બિહારના ભાગલપુરમાં ગંગા નદી પર 1717 કરોડ રૂપિયાના ખર્ચે ભાગલપુરના સુલ્તાનગંજથી ખગડિયાના અગુવાની સુધી બની રહેલો બ્રિજ પત્તાના મહેલની જેમ તૂટી પડ્યો. સૂત્રોના જણાવ્યા અનુસાર, બ્રીજના પિલરના ઓછામાં ઓછા 30 જેટલા સ્લેબ ધોવાઈ ગયા છે. બિહારના મુખ્યમંત્રી નીતિશકુમારે તો આ ઘટનાને પગલે તપાસના આદેશ આપ્યા છે. ગત વર્ષે પણ પૂરપાટ પવન તેમજ ધોધમાર વરસાદ પડવાના કારણે આ બ્રીજ તૂટી પડ્યો હતો. વર્ષ 2014માં આ બ્રીજ બનવાની શરૂઆત થઈ હતી. અને ત્યારસુધીમાં 8 વખત આ બ્રિજના કામને પૂરું કરવાની ડેડલાઈન આગળ વધારી ચૂકાઈ છે. અને ગુજરાત માટે ચિંતાજનક વાત એ છે કે, આ ભાગલપુર બ્રિજ બનાવવાનો કોન્ટ્રાક્ટ જે કોન્ટ્રાક્ટરને આપવામાં આવ્યો હતો તે જ કોન્ટ્રાકટર ગુજરાતમાં બેટ દ્વારકાનો સિગ્નેચર બ્રિજ બનાવી રહ્યો છે તેવી જાણકારી સામે આવી છે.
ઉલ્લેખનીય છે કે, ઓખા અને બેટ દ્વારકા વચ્ચે પરિવહન કરવા માટે જળમાર્ગ જ એક માત્ર વિકલ્પ હોવાથી 2017માં કેન્દ્ર સરકાર દ્વારા અહીં કેબલ પર ટકી રહે તેવા 89 ફૂટ પહોળા બ્રિજને મંજૂરી આપવામાં આવી હતી. હરિયાણાની S.P. સિંગલા કન્સ્ટ્રક્શન્સ પ્રાઈવેટ લિમિટેડને આ બ્રિજ બનાવવાનો કોન્ટ્રોક્ટ આપવામાં આવ્યો છે. ઓખા અને દ્વારકાના દરિયાઈ પટ્ટે બનાવવામાં આવી રહેલ સિગ્નેચર બ્રિજની જવાબદારી પણ હરિયાણાની કંપની પાસે જ હોવાથી બ્રિજમાં વપરાય રહેલ મટિરિયલની ગુણવત્તા અંગે પણ સવાલ તેમજ ચિંતા ઉભી થાય તે સ્વાભાવિક છે. એટલે જ નહીં પણ નર્મદા નદી પર વડોદરા જીલ્લાના ડભોઈ સિનોરના બ્રિજ બનાવવાની જવાબદારી પણ એસ પી સિંગલા કન્સ્ટ્રક્શન પાસે જ છે.
નોંધનીય છે કે, એપ્રિલ 2022માં અગુવાનીથી સુલ્તાનગંજને જોડતો આ બ્રીજ તૂટી પડ્યો હતો. અને તે સમયે બિહારના મુખ્યમંત્રી તેમજ કેન્દ્રના પરિવહનમંત્રીએ બ્રિજના બાંધકામમાં હલકી ગુણવત્તાવાળા મટિરિયલનો ઉપયોગ થઈ રહ્યો છે તેવી દલીલ કરી હતી. ત્યારે ફરી એકવાર બ્રિજ પડી જતા હવે આ મામલે આ કોન્ટ્રાક્ટર વિરુદ્ધ બિહાર સરકારે આકરાં પગલાં ભરવાની જાહેરાત કરી છે.
