ઓડિશા ટ્રેન અકસ્માતઃ પીએમ મોદીએ બાલાસોરમાં અકસ્માત સ્થળની મુલાકાત લીધી, હોસ્પિટલમાં ઘાયલોને મળ્યા

ઓડિશાના બાલાસોરમાં એક ભયાનક ટ્રેન અકસ્માત થયો છે.આ ટ્રેન દુર્ઘટનામાં 288 લોકોના મોત થયા છે અને 1000થી વધુ લોકો ઘાયલ થયા છે. મૃત્યુઆંક વધી શકે છે અને ઘાયલોની સારવાર ચાલી રહી છે. આ દરમિયાન વડાપ્રધાન નરેન્દ્ર મોદી પોતે ઘટનાસ્થળે પહોંચી ગયા છે અને બાલાસોરમાં ઘટનાસ્થળનું નિરીક્ષણ કર્યું છે.

PMએ જ્યારે ઘટનાસ્થળની મુલાકાત લીધી ત્યારે તેમની સાથે કેન્દ્રીય રેલવે પ્રધાન અશ્વિની વૈષ્ણવ અને કેન્દ્રીય પ્રધાન ધર્મેન્દ્ર પ્રધાન પણ હતા. આ દરમિયાન પીએમ મોદીએ સ્વાસ્થ્ય મંત્રી અને કેબિનેટ સેક્રેટરી સાથે ફોન પર વાત કરી અને જરૂરી સૂચનાઓ આપી. પીએમએ ઘાયલોને તમામ શક્ય મદદ આપવા પણ કહ્યું છે. આ પછી પીએમ મોદી બાલાસોરમાં હોસ્પિટલમાં ગયા અને ઘાયલોને પણ મળ્યા.

પીએમ મોદીએ કહ્યું કે બાલાસોરની ઘટના ખૂબ જ દર્દનાક અને હેરાન કરનારી છે. અકસ્માતનું વર્ણન કરવા માટે મારી પાસે શબ્દો નથી. અમે ઘાયલોની સારવારમાં કોઈ કસર છોડીશું નહીં. ગુનેગારોને કડકમાં કડક સજા મળશે. ઓડિશા સરકારે શક્ય તમામ મદદ કરી છે. આશા છે કે આપણે આ ઘટનામાંથી શીખીશું.

પીએમ મોદીએ અધિકારીઓને ઘાયલો અને તેમના પરિવારોને તમામ જરૂરી સહાય પૂરી પાડવા જણાવ્યું છે. તેમણે એમ પણ કહ્યું કે શોકગ્રસ્ત પરિવારોને અસુવિધાનો સામનો કરવો ન પડે અને અસરગ્રસ્તોને જરૂરી સહાય મળતી રહે તેની ખાસ કાળજી લેવી જોઈએ.

આ ઘટના પર કેન્દ્રીય મંત્રી પ્રહલાદ જોશીનું નિવેદન પણ સામે આવ્યું છે. તેમણે કહ્યું કે ટ્રેન દુર્ઘટના ખૂબ જ દુર્ભાગ્યપૂર્ણ છે. આ સમાચાર સાંભળીને અમને ખૂબ જ દુઃખ થયું છે. રાહત કાર્ય ચાલી રહ્યું છે. કેન્દ્રીય રેલવે મંત્રી સ્થિતિ પર નજર રાખી રહ્યા છે. અમે ઘટનાની તપાસ કરી રહ્યા છીએ.